Córdoba, 0-Celta, 0.

Malia que non aproveitou a ocasión de acadar o primeiro posto, o Celta afiánzase nos lugares de ascenso co empate colleitado onte en Córdoba. As derrotas de Betis e Rayo Vallecano nos daban a oportunidade de tomar o liderato e non o conseguimos, pero puidemos manter a espectacular xeira de 12 partidos seguidos invictos e afastarnos un puntiño máis do terceiro clasificado.

En parte do celtismo quedou un mal sabor de boca polo punto de onte, algo que tristemente vén sendo habitual cada vez que non se gaña (pensamos que somos o Barcelona?). É certo que os nosos non xogaron un gran partido e que en certos momentos pareceron preferir asegurar o empate e arriscar só o xusto, pero é absurdo pensar -como parece que facían algúns- en ascender na xornada 24 e o importante é manter a traxectoria, que segue a ser sobresaínte.

O Córdoba apostou por unha táctica conservadora e non se botou arriba case en ningún momento. Mentres, o Celta parecía esperar algún adiantamento de liñas dos locais para sorprendelos e, de feito, as nosas mellores xogadas no primeiro tempo chegaron logo de retrasar os balóns aos centrais para tentar de provocar a apertura de liñas dos andaluces. Tras uns primeiros 45 minutos con pouco que reseñar, a entrada no campo de Iago Aspas e Dani Abalo pareceu dar máis mordente ofensiva aos nosos, xa que nin Michu nin David Rodríguez estaban a ter o mellor día. Mentres o Córdoba se facía cada vez máis conservador e se conformaba escandalosamente co punto, os célticos crearon algunhas opcións de bastante perigo que non se puideron transformar en gol, especialmente das que dispuxeron Álex López, Iago Aspas e David Català.

Analisándoo friamente, o empate é un bo resultado; está claro que puido ser mellor, pero tampouco sabemos como tería respondido o Córdoba a unha eventual táctica máis arriscada dos nosos. Logo da vitoria do pasado luns fronte ao Numancia seguimos a estar un punto por riba da chamada "media inglesa", que -iso si- debemos manter derrotando este sábado ao decepcionante Tenerife.